(၂၄-၄-၂၀၂၀ ရက်နေ့၊ ချင်းမိုင်မြို့)
၁။ ချင်းမိုင်ပြည်နယ်အုပ်ချုပ်ရေးမှူးရုံးသည် COVID-19 ကူးစက်မြန်အသက်ရှုလမ်းကြောင်း ဆိုင်ရာရောဂါကြောင့် စားဝတ်နေရေးအခက်အခဲများ ကြုံတွေ့ရလျက်ရှိသည့် အခြေခံ လူတန်းစား များအတွက် စားနပ်ရိက္ခာနှင့်အခြားအထောက်အပံ့များ စုပေါင်းလှူဒါန်းခြင်း အစီအစဉ် တစ်ရပ်အား ဦးဆောင်ဆောင်ရွက်လျက်ရှိရာ ချင်းမိုင်မြို့အခြေစိုက် ကောင်စစ်ဝန်အဖွဲ့သည် ထိုင်းဘတ် ၂၂,၄၆၅/- တန်ဖိုးရှိ ဆန်၊ ငါးသေတ္တာ၊ ခေါက်ဆွဲခြောက်၊ နွားနို့ အစရှိသည့် စားနပ်ရိက္ခာများအား ချင်းမိုင်ပြည်နယ်အုပ်ချုပ်ရေးမှူး Mr. Chroenrit Sanguansat ထံသို့ ၂၀-၄-၂၀၂၀ ရက်နေ့ နံနက် ၁၀၁၅ နာရီအချိန်တွင် လွှဲပြောင်းပေးအပ်လှူဒါန်းခဲ့ပါသည်။
၂။ ယင်းလှူဒါန်းပွဲအခမ်းအနားသို့ ချင်းမိုင်မြို့ ကောင်စစ်ဝန်အဖွဲ့ နာယက၊ မြန်မာကောင်စစ်ဝန်ချုပ် ဦးသိန်းတင်၊ အိန္ဒိယနိုင်ငံ ကောင်စစ်ဝန် Mr. Shirish Jain၊ ဗြိတိသျှဂုဏ်ထူးဆောင်ကောင်စစ်ဝန် Mr. Ben Svasti Thomson၊ ဆွစ်ဇာလန်ဂုဏ်ထူးဆောင် ကောင်စစ်ဝန် Mr. Marc-Henri Dumur၊၊ အိုင်ယာလန် ဂုဏ်ထူးဆောင်ကောင်စစ်ဝန် Ms. Annette Kunigagon၊ ပေါ်တူကီဂုဏ်ထူးဆောင် ကောင်စစ်ဝန် Mr. Nuno Manuel de Pimentel Caldeira da Silva တို့တက်ရောက်ခဲ့ကြပါသည်။ ယင်းစုပေါင်းလှူဒါန်းမှုတွင် နိုင်ငံ (၁၈) နိုင်ငံမှ ချင်းမိုင်မြို့အခြေစိုက် ကောင်စစ်ဝန်ချုပ်ရုံး၊ ကောင်စစ်ဝန်ရုံးနှင့် ဂုဏ်ထူးဆောင် ကောင်စစ်ဝန်ရုံး များမှ စုပေါင်းလှူဒါန်းခဲ့ကြခြင်းဖြစ်ပါသည်။
၃။ ယင်းစားနပ်ရိက္ခာများအား ချင်းမိုင်မြို့တွင် အိမ်ထောင်စုစာရင်းမရှိသည့် ရွှေ့ပြောင်း အလုပ်သမားများ၊ တိုင်းရင်းသားလူမျိုးစုများ၊ လုပ်သားများအား လှူဒါန်းသွားမည်ဖြစ်ကြောင်း သိရှိရပါသည်။
မြန်မာကောင်စစ်ဝန်ချုပ်ရုံး၊ ချင်းမိုင်မြို့
ရက်စွဲ၊ ၂၀၂၀ ပြည့်နှစ် ဧပြီလ ၂၄ ရက်
ချင်းမိုင်ပြည်နယ်အုပ်ချုပ်ရေးမှူး Mr. Chroenrit Sanguansat ထံသို့ စားနပ်ရိက္ခာ အထောက်အပံ့များ ပေးအပ်လှူဒါန်းစဉ်
မှတ်တမ်းဓာတ်ပုံရိုက်ကူးစဉ်
စုပေါင်းလှူဒါန်းမှုမှတ်တမ်း